Nga Boldnews.al
Kur ish-drejtori i Përgjithshëm i Policisë së Shtetit Ardi Veliu u detyrua të jepte dorëheqjen, emri i Gledis Nanos, në atë kohë Drejtor i Antiterrorit, u përcaktua si pasardhës i Veliut i njohur si “velina kryeministrore). Shumë menduan që do ishte ndryshe nga i pari, të tjerë thanë ti lihet kohës, por koha po tregon se Policia e Shtetit nuk ka dalë ende nga rrethi i policisë së pushtetit.
30 qytetarë janë arrestuar dhe 90 të tjerë u proceduan penalisht në dy protestat e fundit të mbajtura në Tiranë kundër rritjes së çmimeve. Asnjë xham i thyer, asnjë kapele policie e rënë përtokë,pavarësisht se ajo strehë lecke me korrupsion u ka kushtuar 300 euro, asnjë guriçkë e hedhur, por shifra e të arrestuarve të tremb vërtetë. Nën moton se po zbaton ligjin dhe se bllokimi i rrugëve nga protestuesit është vepër penale, Gledis Nano po i trajton qytetarët e paqtë si terroristë.
Pamjet kur policë të mbuluar nga kapuçët e zinj tërheqin zvarrë dhe dhunshëm qytetarët duke i shoqëruar, pa kryer asnjë akt dhune, janë të ngjashme me atë që ndodh me protestat në Rusi. Edhe aty policia mësyn mbi protestuesit paqësorë, për ti përplasur në qelitë e burgut. Asgjë nuk ndryshon edhe në Shqipëri, ku agresiviteti dhe urrejtja që shprehet nga një pjesë e strukturave të rendit po kalon çdo kufi.
Prova e parë për Nanon ishte pikërisht këto tre ditë dhe ai e kaloi këtë provë vetëm me një individ, ai është kryeministri Edi Rama. Nano dhe drejtuesit e tjerë të lartë shprehën zellin e dhunës mbi ata që ngrenë kryet për të protestuar kundër rritjes së karburanteve dhe ushqimeve bazë. Një protestë varfërie që duket se nuk ndjehet aspak e tillë as nga elita drejtuese në pushtet dhe as elita e policisë.
Supet e Nanos, që për disa kohë u përjashtua nga radhët e policisë në një dyshim për lidhje me elementë të krimit të organizuar, pa një viti u stolisën me dekorata nga ambasadorja amerikane Yuri Kim. Për ta Nano kishte dhënë prova se ishte i zellshëm në luftën kundër terrorizmit. Ulja në krye të Policisë së Shtetit kaloi edhe me aprovimin në heshtje të opozitës, por sot në komistiatet e vendit mbahen studentë dhe shumë të rinj që të vetmin :krim” që kryen ishte ngritja në protestë dhe parrulla kundër qeverisë.
Mund të jetë vendi që i bën kryepolicët shërbëtorë të pushtetit dhe sot Nano mund të varë të tjera medalje që i dhurohen nga mazhoranca, por ka humbur vlerësimin qytetar. Pikërisht këta të fundit nuk po trajtohen si të tillë, por “terroristë” që reagojnë kundër varfërisë dhe shtypjes nga pushteti. Më i gëzuar në këtë situatë mund të ketë dalë Ardi Veliu, i cili sheh sesi pasardhësi i tij po ndjek të njëjtat metoda.
