Analisti Armand Shkullaku, e konsideron “shansin e fundit për Berishën”, atë që po ndodh në Partinë Demokratike.
I ftuar në emisionin “Të Paekspozuarit”, në MCN TV, Shkullaku tha se PD ka shpresë të arrijë fitoren me Berishën dhe nëse ai e keqpërdor këtë mundësi “meriton dënimin më të madh”.
“Ka vetëm një shpresë që PD të arritë aty ku aspiron, për mirë ose për keq është Berisha. Ai duhet të kuptojë, që edhe për shkak të rrethanave, kjo është hera e fundit që shqiptarët i japin besim. Nuk ka një provë tjetër për Berishën pas kësaj. Nëse ka hyrë në këtë proces për ta lënë në mes, apo për të emëruar dikë tjetër, ky do të jetë një problem.
Berisha arriti që në një kohë rekord, duke patur vulën kundër, Ramën kundër, median me dhe pa pagesë kundër, amerikanët kundër, Berisha arriti të marrë 30% të votave të shqiptarëve, në një ditë të zezë. Mos harroni se pas 25 prillit, në Shqipëri u shua shpresa se ky regjim mund të përmbyset. Ky arriti t’i zgjojë.
Nëse Berisha e keqpërdor këtë është shansi i fundit dhe nëse e çon në aventurë meriton dënimin më të madh.
Njëlloj si Nano që kur e mori partinë e bëri si ata që kishin kritikuar, qeverisi me tarafin e vet”, tha Shkullaku.
