Bardh Spahia zyrtarisht është fitues i zgjedhjeve në Bashkinë e Shkodrës, pasi diferenca e votave që ai ka me vendin e dytë, ku renditet kandidatja e PS-së, Majlinda Angoni, është më e madhe se numri i votuesve që kanë në 3 qendra votimi, ku një ditë më parë nuk u zhvilluar zgjedhjet.
Nga numërimi i 247 kutive të votimit, nga 250 që ka në total Bashkia Shkodër, përfshi edhe 3 qendrat ku nuk u votua, Spahia ka marrë mbështetjen e 20125 qytetarëve, ndërkohë që Majlinda Angoni e PS renditet e dyta me 18176 vota.
Kandidati i 3-të është Xhemal Bushati i PD, i cili ka marrë 7739 vota.
Në 3 qendrat e votimit ku nuk u mbajtën zgjedhjet për shkak të kushteve atmosferike votojnë jo më shumë se 1300 zgjedhës, ndërkohë që diferenca mes Spahisë dhe Angonit është mbi këtë shifër, çka do të thotë se kandidati i “Shtëpia e Lirisë” është automatikisht fitues i zgjedhjeve.
Një ditë më parë kryekomisioneri Ilirjan Celibashi tha se zgjedhjet në Bashkinë e Shkodrës mund të përsëriteshin në rast se fituesi do të kishte një diferencë votash më të vogël se numri i zgjedhësve në 3 qendrat e votimit.
Ndërkohë fitorja e Bardh Spahisë në Shkodër është pranuar edhe nga Partia Socialiste.
