Ish kryeministri, Sali Berisha, i cili mbështeti dhe udhëhoqi fushatën e kandidatëve të koalicionit “Shtëpia e Lirisë” në 6 bashkitë e vendit ku u mbajtën zgjedhjet e pjesshme vendore, u shpreh në një reagim të tij, se këto zgjedhje janë kushtrimi për çdo demokrat në Shqipëri që të bashkohemi sepse populli votoi opozitën e vërtetë.
“Të bashkohemi rreth PD të rithemeluar”, tha Berisha, duke i dhënë një mesazh të gjithë demokratëve.
Ai ka falenderuar qytetarët shkodranë, të cilët me votën e tyre zgjodhën Bardh Spahinë për kryetar të bashkisë së Shkodrës si përfaqësues të Shtëpisë së Lirisë.
“Shkodra është simbol i frymëzimit të popullit shqiptar. Ajo mbetet e pamposhtur. Kam një falenderim të veçantë edhe për aleatët tanë të cilët u angazhuan me një përkushtim të veçantë në këtë fushatë elektorale. Gjithashtu falenderoj të gjithë qytetarët.
Natyrisht rezultati u arrit në kushtet më të vështira dhe të jashtëzakonshme pasi PD u përball në këto zgjedhje jo vetëm me kreun e Meduzës por edhe me patericën e tij, me shtojcën e tij, Lulzim Bravën i cili sot është demokrati i vetëm në Shqipëri që ndjehet se nuk humbet dhe nuk ka humbur. Pra i ka dhënë një zgjidhje problemit duke shpallur çdo humbje, në mos fitore, të paktën jo-humbje”, tha Berisha.
