Indrit Sefa, kandidati i Partisë Demokratike për Bashkinë e Lushnjes, i cili u rendit i 3-ti në garën për kryebashkiak, përmes një postimi në rrjetet sociale, shkruan se qytetarët e presin ndryshimin nga PD.
Sefa shkruan se ne duhet të rigjejmë vetveten dhe tu japim njerëzve ndryshimin. “Për fat të keq, në zgjedhje nuk doli pjesa më e madhe e qytetarëve që bëjnë ndryshimin. Mesazhin e kam lexuar qartë. Debati ynë i brendshëm politik ka gërryer besimin e njerëzve tek Partia Demokratike dhe tek politika në tërësi”, shkruan Sefa.
Postimi nga Indrit Sefa
Mirënjohje për bashkëqytetarët që i besuan Partisë Demokratike dhe mua personalisht në këtë garë të pazakontë dhe në kushte të pazakonta. Dua të falenderoj nga zemra stafin tim në këtë fushatë dhe cilindo që besoi se Lushnja ka nevojë për të ndryshuar.
Për fat të keq, në zgjedhje nuk doli pjesa më e madhe e qytetarëve që bëjnë ndryshimin. Mesazhin e kam lexuar qartë. Debati ynë i brendshëm politik ka gërryer besimin e njerëzve tek Partia Demokratike dhe tek politika në tërësi.
Mirëpo, ndryshimin qytetarët e kërkojnë nga NE, Partia Demokratike e Shqipërisë.
Ne duhet të rigjejmë vetveten dhe t’u japim njerëzve NDRYSHIMIN!
