Vrasja e dy grave, Fatmira dhe Bukurie Bami, përkatësisht 60 dhe 80 vjeç, në fshatin Progër të Devollit, ka shkaktuar reagime të forta të banorëve të zonës.
Autori ka pasur precedent të mëparshëm penalë dhe sipas banorëve ai ndalohej dhe më pas lirohej nga policia.
“Ai nuk e ka herën e parë këtë gjë që bën. Policia e Devollit e merr e lëshon, ta varrim këtu në mes të fshatit”, tha një prej banorëve për autorin e krimit të dyfishtë.
Policia sqaron se pas identifikimit është arrestuar në flagrancë edhe autori i ngjarjes 36-vjeçari Ali Zili, i cili kishte hyrë në banesën e viktimave për t’i kërkuar lekët që pretendonte se i kishte borxh.
Por në momentin që ka hasur në rezistencën e tyre, i ka dhunuar ato me sende të forta duke ju shkaktuar vdekjen. Bukurie Bami dhe Fatmira Bami jetonin vetëm, pasi burrat e tyre kanë vdekur. Kurse dy fëmijët e 60 vjeçares janë emigrantë.
