Ali Zili, 36 vjeç, u arrestua nga policia si autori i dyshuar që vrau nuse e vjehërr në banesën e tyre në fshatin Progër në Devoll.
Një nga pistat që po heton policia ka të bëjë me një borxh të pakthyer nga viktimat kundrejt autorit, pas shitjes së druve.
Por gjatë një rrëfimi për mediat, Gjergji Zili, vëllai i të arrestuarit, ka mohuar faktin se viktimat i kishin mbetur borxh vëllait të tij.
“Lekët e druve të shitura vëllait ja ka dhënë 60 vjeçarja”, është shprehur Gjergji Zili, duke rrëzuar kështu alibinë e Ali Zilit dhënë për policinë.
Nga ana tjetër Gjergji Zili është shprehur se më vjen turp të dal në fshat aq më tepër të dalë para familjarëve të dy viktimave.
Ai thotë se nuk e kishte parë vëllanë prej dy ditësh derisa ka shkuar në shtëpi mbrëmë në mëngjes pasi ka vrarë nuse e vjehërr. Sipas tij vëllai pinte alkool dhe nuk dinte se çfarë bënte. Gjergji Zili thotë se ka denoncuar dhe ai vetë të vëllanë disa herë por policia e kishte lënë të lirë.
“Unë kam lënë shtetin të veprojë, ishte rënduar, ka dy ditë që është larguar nga shtëpia. Shteti le të marrë masa. Lekët që fitonte i harxhonte në lokal dhe pinte alkool. Ka pasur edhe dhunë në familje dhe për këtë punë unë e kam denoncuar në polici, para 3 javësh ishte në komisariat. I kam thënë policisë mos e lëshoni se do të bëjë ndonjë vrasje, i kam thënë, siç e bëri. Ai po të pinte alkool, nuk duhet t’i fliste njeri. Unë kam krushqi me atë familje që ai kreu krimin, shteti të marrë masat dhe të veprojë sipas ligjit. Nuk ka pasur probleme me lekët, jam shumë mirënjohës asaj familje dhe më vjen rëndë nuk i dal dot përballë as fëmijëve të saj dhe më vjen rëndë të ndal në fshat sepse i kam vëllezër i kam motra. Nuk e di cfarë ka ndodhur! Policia e gjeti në shtëpi, mbrëmë e kam kontrolluar dhe nuk e kam gjetur, nga ora 5 e mëngjesit e dëgjova që u fut në shtëpi. Kur erdhi nuk foli fare, më tha djali është i menduar. Ishte rënduar me alkool”, tha vëllai i autorit.
