KQZ bëri testimin e fundit operacional të pajisjes së votimit elektronik, përmes së cilës do të votojnë zgjedhësit e Bashkisë Vorë. Komisioneri Shtetëror Ilirjan Celibashi, tha se janë marrë të gjitha masat që vota të jetë e fshehtë dhe e sigurtë, dhe se të dielën do të shpallet rezultati paraprak për këtë bashki.
“Ditën e dielë ekziston siguria dhe garancia për fshehtësinë e votës. Ka qenë kohë mjaft e shkurtër për të zhvilluar një fushatë edukuese dhe informuese për të gjitha kategoritë e votuesve. Edhe ata të moshës së tretë nuk do kenë asnjë lloj problemi”-tha Celibashi.
Emri i parë i kryebashkiakut të ri të dalë nga këto zgjedhje do të jetë ai i Vorës. Celibashi tha se pas përfundimit të procesit, do të publikohet edhe rezultati paraprak në këtë bashki.
“Kemi marrë të gjitha masat të karakterit organizativ dhe teknik që rezutlatin e zgjedhjeve për çdo qendër votimi ta shpallim menjëherë sapo të përfundojë procesi i votimit.”-tha Celibashi.
Sakaq, Ilirjan Celibashi garantoi se vota do të jetë e fshehtë dhe e sigurtë.
