Sekretari i Përgjithshëm i NATO-s, Jens Stoltenberg, në një deklaratë për mediat pas takimit në Bruksel me ministrat e Jashtëm të vendeve të NATO, ai u shpreh se ditët në vijim ka gjasa të jenë më të këqija, duke iu referuar luftës mes Rusisë dhe Ukrainës.
“Ditët që do të vijnë ka të ngjarë të jenë më të këqija për Ukrainën, me më shumë vdekje, më shumë vuajtje dhe më shumë shkatërrim”, tha ai.
Stoltenberg shtoi se nuk përjashtohet mundësia që Rusia të dërgojë në Ukrainë “armë më të rënda”, teksa sulmet dhe bombardimet e ushtrisë ruse vazhdojnë mbi qytetet kryesore ukrainase.
Megjithatë, Stoltenberg theksoi se ka ende shanse që ky konflikt të zgjidhet përmes diplomacisë.
“I bëjmë thirrje Presidentit Putin që të ndalojë menjëherë këtë luftë, të tërheqë pa kushte të gjitha forcat e tij nga Ukraina dhe të angazhohet në diplomaci të vërtetë”.
Sa i përket mbylljes së hapësirës ajrore të Ukrainës, Sekretari i NATO-s tha se vendet e aleancës ranë dakord që nuk do të ketë prezencë të trupave ushtarake të NATO në Ukrainë, pavarësisht thirrjeve të Kievit për të zbatuar masën e ndalim-fluturimit.
