Nga Boldnews.al
E mërkurë, 2 mars, mesditë. Lajme të frikshme vijnë nga fronti i luftës Rusi-Ukrainë, mijëra të vrarë, miliona të shpërngulur dhe kërcënime me përdorim të armëve bërthamore. Por edhe qeveria shqiptare nuk rri kot. Ajo po thur “plane gjeostrategjike”, duke sjellë nvestime strategjike që mund të ndihmojnë edhe në përballimin global të luftës.
Nuk kishte si të ndodhte ndryshe. Artan Gaçi, ish-deputet socialist dhe bashkëshorti i Ministres së Punëve të Jashtme dhe Evropës, Olta Xhaçka, ka një plan brilant për të ndërtuar një hotel luksoz në Himarë dhe qeveria i ka dhënë për shfrytëzim 30 vite edhe bregdetin aty pranë.
“Lejimin e përdorimit të brigjeve të detit dhe të zonës përkatëse të plazhit përballë kompleksit, në funksion të realizimit të projektit investues strategjik “Dreamades Luxury Suites”, Gjilekë, Himarë, i cili me vendimin nr.3/5, datë 29.3.2021, të Komitetit të Investimeve Strategjike, të ndryshuar, ka përfituar statusin “Investim/investitor strategjik, procedurë e asistuar”, thuhet në vendimin e Këshillit të Ministrave që mban vulën e vetë Ramës, ndryshe nga shumë herë të tjera që në mungesë dhe me porosi të tij autorizonte zëvendëskryeministrin Arben Ahmetaj.
Po, vetë ministrja Xhaçka e meriton një superhotel, pas punës së saj brilante si ministre e jashtme dhe strategjisë diplomatiko-ushtarake për të vendosur Rusinë në vështirësi të mëdha. Por, pas ndërtimit të hotelit luksoz dhe dhënies në përdorim të vijës bregdetare nuk fshihet vetëm përfitimi personal. Mundësia që ky hotel mund të shërbejë si një vend relaksi për disa koka të nxehta ruse është mjaft e madhe. Nëse ata relaksohen në hotelin e ministres, mund të vijë një zbutje e konfliktit dhe Rusia të ndalë agresionin.
Jo më kot Rama vetë e mori këtë vendim pikërisht në kulmin e luftimeve, ku e gjithë bota është futur në ankth mbi pasojat që mund të shtrihen në të gjithë botën. Rilindja ka projekte dhe plane strategjike për Shqipërinë dhe gjeostrategjike për botën.
Si mundet që në këtë situatë të vështirë Xhaçka dhe bashkëshorti i saj të mos mbështeten? Fundja çfarë është një hotel i madh dhe ca qindra kilometra katrorë vijë bregdetare si shpërblim për punën e mirë që ka bërë? Ministrja ka qenë një nga nismëtaret që Shqipëria të jetë “bashkëpenë-mbajtëse” në Këshillin e Sigurimit të Organizatës së Kombeve të Bashkuara ku u dënua politika ruse për luftën në Ukrainë.
Netë të tëra ka qëndruar pa gjumë, orë të gjata në fluturime sa qëndrimi i saj në ajër duke përballuar edhe turbulencat e çonin nga sakrifica në sakrificë. Bashkëshorti i saj Gaçi me krenari u shpreh për mediat se “Unë jam investitor strategjik dhe po ndërtoj një hotel, nuk po ndërtoj vila siç bëjnë të tjerët”. Dhe ka shumë të drejtë, strategjia e Rilindjes është mjaft e qartë që duke ia dhënë lejen për ndërtimin e hotelit luksoz dhe përdorimin e vijës bregdetare mund të vijnë jahtet e oligarkëve rusë, e më pas këta të fundit të ndikojnë që Putini të tërhiqet nga lufta. Ja sa të thella janë punët e qeverisë sonë…!
