Presidenti ukrainas, Volodymyr Zelensky tha se Vladimir Putin gaboi kur mendoi se ukrainasit mund të thyheshin ose të detyroheshin të dorëzoheshin, dhe ai e krahasoi dëshirën e Presidentit rus për të shkatërruar Ukrainën me një sëmundje.
Presidenti ukrainas vuri në dukje se saktësisht 2 vjet më parë u regjistrua rasti i parë me Covid-19 në Ukrainë dhe pikërisht një javë më parë “Ukraina u sulmua nga një tjetër virus”.
“Një javë më parë, në orën 4 të mëngjesit, Rusia pushtoi Ukrainën. Agresion akut, mani për madhështi, mani për persekutim. Komplekse të rënda psikologjike dhe si rezultat – sisteme raketore. Artileri reaktive. Tanke dhe mjete të tjera të blinduara ashtu si karkalecat. Orët dhe ditët e para luftërat ishin jashtëzakonisht të vështira. Por ne ishim të bashkuar, dhe për këtë arsye të fortë duruam. Dhe kështu do të jetë. Ne vazhdojmë të qëndrojmë”, tha Zelensky.
Sipas tij, pushtuesit u detyruan të ndryshonin taktikë dhe të nisnin sulme me raketa dhe bomba në qytetet e Ukrainës, sepse “ata nuk mund të bënin asgjë të rëndësishme në tokë”. Por të gjitha linjat e mbrojtjes së Ukrainës janë ruajtur, shtoi ai.
Zelensky kujtoi se Ukraina ka përjetuar dy luftëra botërore në historinë e saj, tre Holodomor, Holokaustin, Babyn Yar, Terrorin e Madh, shpërthimin e Çernobilit, pushtimin e Krimesë dhe luftën në lindje.
“Ne nuk kemi një territor të madh – nga oqeani në oqean, pa armë bërthamore, ne nuk e mbushim tregun botëror me naftë dhe gaz. Por ne kemi njerëzit tanë dhe tokën tonë. Për ne është ari. Nuk kemi asgjë për të humbur veç lirisë dhe dinjitetit tonë, ky është thesari ynë më i madh. Shumë herë donin të na shkatërronin, por nuk mundën. Ata donin ta fshinin nga faqja e dheut, por nuk ia dolën. Na kanë rrahur pas shpine, por jemi në këmbë. Ata donin që ne të heshtim, por e gjithë bota na dëgjoi. Ne kemi kaluar kaq shumë! Dhe nëse dikush mendon se, duke e kapërcyer gjithë këtë, ukrainasit – të gjithë ne – jemi të frikësuar, të thyer ose të dorëzuar – ai nuk di asgjë për Ukrainën dhe nuk ka çfarë të bëjë në Ukrainë”, u shpreh Zelensky.
Më tej, Zelensky iu drejtua Putinit në rusisht: “Shko në shtëpi. Shko në shtëpi. Mbro njerëzit që flasin rusisht. Jo në mbarë botën. Po në vendin e tij. Ka pothuajse 150 milionë. Dhe këtu … Lavdi Ukrainës.”
