Ish-Kryeministri Sali Berisha po zhvillon një takim me banorë të Xhafzotajt në mbështetje të kandidatit për kryebashkiak të “Shtëpisë së Lirisë”, Ardian Muka. Berisha ka kërkuar mbështetjen e qytetarëve për kandidatin Muka, duke e cilësuar 6 marsin si ditën e kthimit të shpresës për shqiptarët.
Berisha tha se pak ditë na ndajnë nga ndryshimi që presin jo vetëm qytetarët e Durrësit, por mbarë qytetarët shqiptarë.
Ish-Kryeministri tha se prej 22 vitesh Durrësi qeveriset nga përfaqësuesit socialistë dhe cilido që mendon se në këto 22 vite ka marrë shërbimin e duhur, le të vazhdojë ta mbajë atë mendim, por ktheni kokën pas dhe shikoni se si janë përdorur taksat tuaja, pasi investimet kanë qenë të papërfillshme.
Për këto shkaqe, tha ish-Kryeministri, sot nga Durrësi po largohen çdo ditë e çdo muaj, me qindra e mijëra të rinj, pasi iu është vrarë shpresa.
Berisha tha se me 6 mars ne duhet ti kthejmë shpresën shqiptarëve, dhe të rrëzojmë një orë e më parë këtë regjim, që vrau shpresën. Ish-Kryeministri deklaroi se Edi Rama dhe Lulzim Basha sot duan të përvetësojnë 820 mijë metra katror të portit të Durrësit, ndërkohë që kjo është prona juaj.
Kandidati Muka duke iu drejtuar të pranishmëve tha se me 6 mars jo vetëm do e fitojmë të gjithë bashkë bashkinë, por do e administrojmë bashkarisht atë.
Muka i ka bërë thirrje dmokratëve që të mos gënjehen nga kandidati i Lulzim bravës, pasi opozita e vërtetë është “Shtëpia e Lirisë”, jemi ne.
Ai tha se bashkia e Durrësit do i kthehet qytetarëve ndërsa theksoi se Vangjush Dako po përpiqet që tani që të manipulojë votat në favor të kandidates së PS, Emiriana Sako.
“Është një ngarkese, detyrë e madhe të cilën nuk e mbaj dot vetëm, por të gjithë bashkë do t’ia dalim të fitojmë bashkinë dhe ta administrojmë atë të gjithë bashkë. Jam një nga ju, djalë durrësi dhe mjaft i thjeshtë. Ata që vijnë e kërkojnë votën, e kam fjalën për zonjën Sako, që është dikush që fshihet pas saj, Vangjush Dako, po përpiqet të manipulojë votën për herë të katërt. E kemi parë këtë film, besoj nuk prisni që të jetë ndryshe kësaj radhe, në fund ka abuzim dhe keqtrajtim. Të gjithë bashkë t’i bashkohemi vizionit që ne kemi.”-tha Muka.
Muka theksoi se Bashkia e Durrësit nesër do ketë një fytyrë njerëzore ku zëri i qytetarëve do të dëgjohet.
“Bashkë do flasim dhe bashkë do t’i bëjmë gjëra, si ta bëjmë Durrësin më të mirë. Duke e bërë të gjithë bashkë, nuk do bëjmë gabime. Duke ju parë në sy, duke ju shtrënguar dorën, përditë po kuptoj që të gjithë ju keni diçka për të thënë. Po më thoni që keni nevojë për ndryshim. Keni nevojë që ata që abuzojnë me fondet tona, me votën tonë, jam i bindur që shumica s’keni votuar për ata që janë në bashki. Por, me marifetet e tyre ata kanë arritur që të manipulojnë një pjesë të votave.”-tha Muka.
Ai i bëri thirrje durrsakëve që ti thonë ‘jo’ atyre që do t’i trokasin në derë për t’ju dhënë votën kundrejt shpërblimeve monetare.
“Gjithë bashkë duhet të kuptojmë që ato mund t’ju blejnë votën atyre që i kanë përdhunuar për 4 vjet, për 15 vjet, për 22 vite. Prandaj duhet të ndërgjegjësohemi. Nuk është vota e pavlefshme, vota është një plumb i vogël që kemi në dorë. Po të bëhemi të gjithë bashkë, bëhet një bombë atomike të cilën ata që abuzojnë sot me ne, e kanë shuëm frikë.”-tha Muka.
Ardian Muka tha se demokratët që shkojë pas Lulzim Bravës, po udhëtojnë në errësirë.
“Më 6 mars të punojmë me pjesën tonë të vogël që për momentin kanë humbur rrugën dhe po udhëtojnë në errësirë, ata që i shkojnë mbrapa deputetit Brava. Ata janë demokratë të thjeshtë, vëllezër që kemi bërë beteja, çadra e famshme, mitingjet ku jemi përleshur me gaz lotsjellës. T’ju shpjegojmë atyre se rruga e duhur është kjo e jona. Duan të përçajnë votën tonë, duke punuar të gjithë bashkë, ajo pjesë do i bashkohet demokratëve”, tha Muka.
