Parlamenti Europian nis procedurat për integrimin e përshpejtuar të Ukrainës në Bashkimin Europian.
Presidenti ukrainas Volodymyr Zelenskiy paraqiti këtë të Hënë një kërkesë zyrtare për të lejuar që vendi i tij të fitojë anëtarësim ‘të menjëhershëm’ sipas një procedure speciale të shpejtë, teksa mbrohet nga një pushtim rus.
“Bashkimi Evropian do të jetë shumë i fuqishëm me ne, kjo është e sigurt. Pa ju, Ukraina do të jetë e vetme”, ka thënë Zelensky në një fjalim para Parlamentit Evropian përmes video-lidhjes.
Ambasadori i Ukrainës në BE, Vsevolod Chentsov, ia dorëzoi kërkesën e vendit të tij ambasadorit francez në BE, Philippe Léglise-Costa, pasi Franca është aktualisht në krye të presidencës së Këshillit të BE-së.
“Aplikimi është i regjistruar. Procesi ka filluar”, citohet Chentsov nga “Euroactiv”, media me bazë në Bruksel.
Thirrja për anëtarësim të përshpejtuar në BE është bërë nga Presidenti ukrainas edhe ditët e mëparshme, ndërsa dje firmosi zyrtarisht kërkesën.
Shefja e BE-së, Ursula von der Leyen ka thënë më herët se Ukraina është “një prej nesh dhe ne i duam ata në Bashkimin Evropian”.
