Të paktën 20 persona janë konfirmuar me “Flurona” në Shqipëri gjatë qarkullimit intensiv të variantit “Omicron” dhe gripit të stinës. Prekja nga Covid -19 dhe gripi njëkohësisht është verifikuar nga Instituti i Shëndetit publik pas analizave të kryera.
Drejtoresha Eugena Tomini tregon se të prekurit me “Flurona” kanë kërkuar trajtim spitalor për shkak të rëndimit të shëndetit nga mbivendosja e dy sëmundjeve.
Edhe pse vala “Omicron” është në zbehje, Tomini deklaron se ky variant vijon të jetë në qarkullim ashtu sikurse Delta dhe virozat respiratore.
Për drejtoreshën e ISHP vaksinimi mbetet procesi i rëndësishëm për të shmangur format e rënda nga Covid -19. Por me kalimin e pikut të pandemisë është ulur ndjeshëm interesi për vaksinën anti-Covid tek të gjitha moshat.
Ndërkohë Ministria e Shëndetësisë përmes marrëveshjes me Pfizer do të blejë 1 milion doza të tjera për këtë vit, nga të cilat 300 mijë pritet të mbërrijnë në mars.
/A2
