“Pokeri” i Tiranës ndaj Laçi trembi rivalët, ishte një goditje e fortë jo vetëm për ekipin e Josës por për të gjithë ata që synojnë ta zbresin nga froni. Në shtëpinë e bardhebluve nuk festojnë, të vetëdijshëm se asgjë nuk ka përfunduar, për më tepër që kalendari vijon në “malore”, pas Teutës përballen me Partizanin në derbin e tretë sezonal.
Shpëtim Duro, tekniku i mirënjohur, i ftuar në “News24”, në emisionin “Sport News” të moderuar nga Enxhi Biba foli për gjithçka prodhoi java e 22-të dhe çfarë pret në vijim, analizoi me detaje ndeshjet që vijnë këtë mesjavë. Duro, ashtu si pjesa më e madhe e opinionin sportiv, nuk e priste një përfundim të tillë në sfidën Tirana-Laçi, por kjo humbje nuk i largon bardhezinjtë nga gara për titull.
Sigurisht nuk mund të mungonte dhe një koment për sfidës e së shtunës, për derbin Tirana-Partizani, për Duron do të ishte një dramë e madhe nëse të kuqtë bien sërish.
“Ky rezultat nuk pritej, po realisht ishte një ndeshje që u bë shumë e lehtë për Tiranën. Nuk e prisja Laçin në këtë situatë pasi ka qenë një skuadër shumë kompakte. Ka pasur dhe doza euforike dhe mendoj që Laçi e mori më me lehtësisht ndeshjen me Tiranën. Kishte gabime të jashtëzakonshme dhe Laçi nuk funksionoi si skuadër, sidomos në aspektin mbrojtës.”
Ndeshja në “Air Albania” – “Kisha besim tek Laçi sepse kemi fituar dy ndeshje me ta 1-0 kur kam qen trajner i tyre. Tirana është shumë e fortë në “Air Albania” ku ka mbështetjen e tifozëve. Laçi duhej të kishte rezistuar të paktën në pjesën e parë. Ky është aspekti ku gabuan. Kam dyshim për Tiranën për ndeshjet në transfertë dhe të shikojmë ndeshjet me Teutën.”
Si do të ndikojë tek skuadrat kjo ndeshje? – “Tirana reagoi shumë mirë pas humbjes me Kastriotin ,tani të shikojmë Laçin. Mënyra si humbi, kapitulloi në të gjitha aspektet. Diferenca nuk është e madhe dhe çdo gjë është e hapur.”
Partizani e kam thënë që ka investuar shumë dhe më çudit fakti që kanë ardhur lojtarë të huaj në janar dhe nuk ekzistojnë fare. Skuka është i vetmi futbollist që e ka zgjidhur ndeshjen në mënyrë individuale. Fati i tyre që e afruan në këtë moment.”
Partizani-Kukësi – “Unë kam thënë që Partizani fillon testin me Vllazninë. Janë jashtë objektivave të klubit. I shoh që bëjnë deklarata që thonë se dominojnë dhe nuk fitojnë. Ndeshja me Kukësin është shumë e rëndësishme duke patur parasysh që ata janë pjesë e sipërme e tabelës.”
