FIFA dhe UEFA kanë vendosur të përjashtojnë nga çdo kompeticion klubet dhe kombëtaren ruse, në kuadrin e sanksioneve që po i vendosen Rusisë pas agresionit me armë ndaj Ukrainës, ndërsa po mbyllet dita e 5-të e luftimeve.
“Pas vendimeve fillestare të marra nga Këshilli i FIFA-s dhe Komiteti Ekzekutiv i UEFA-s, i cili parashikon miratimin e masave shtesë, FIFA dhe UEFA kanë vendosur sot bashkërisht që të gjitha skuadrat ruse, qofshin kombëtare apo klube, do të pezullohen nga pjesëmarrja.
Këto vendime janë miratuar sot nga Byroja e Këshillit të FIFA-s dhe Komiteti Ekzekutiv i UEFA-s, përkatësisht organet më të larta vendimmarrëse të të dy institucioneve për çështje të tilla urgjente.
Futbolli është plotësisht i bashkuar dhe në solidaritet të plotë me të gjithë ata që janë prekur në Ukrainë. Të dy presidentët shpresojnë se situata në Ukrainë do të përmirësohet ndjeshëm dhe shpejt, në mënyrë që futbolli të jetë sërish një vektor i unitetit të paqes mes popujve”, thuhet në njoftimin zyrtar.
Më parë, u vendos që Rusia të përjashtohet nga sistemi Swift, duke mos lejuar disa nga bankat ruse të operojnë me transaksione, sikundër janë pezulluar fluturimet e kompanive ruse në pothuajse të gjitha vendet e BE dhe NATO-s, por edhe në shtete të tjera, në kuadrin e sanksioneve që NATO dhe BE kanë ndërmarrë ndaj Rusisë.
