Gjermania duket se ka ndryshuar qëndrim lidhur me përjashtimin e Rusisë nga sistemi bankar SWIFT, lëvizje e cila i hap rrugë vendosjes së mundshme të këtij sanksioni të rëndë për ekonominë ruse.
“Ne jemi duke punuar urgjentisht për të limituar dëmet kolaterale, nga heqja e SWIFT, në mënyrë që të ndikojë tek njerëzit e duhur. Ajo çfarë na nevojitet, është një kufizim i targetuar dhe funksional i SWIFT“, thanë nëpërmjet një deklarate të përbashkët, ministrja e Jashtme, Annalena Baerbock dhe ministri i Ekonomisë, Robert Habeck.
Pas agresionit të paprecedent ndaj Ukrainës, është diskutuar përjashtimi i Rusisë nga SWIFT, si një sanksion shumë i rëndë që do të godiste ekonominë e këtij vendi. Por, jo të gjithë kanë qenë dakord, veçanërisht Gjermania ka shfaqur hezitim, për shkak se është vendi që ka shkëmbimet më të mëdha me Rusinë në Bashkimin Europian dhe i druhet një ndikimi negativ të këtij sanksioni në ekonominë e vetë.
Ky ndryshim i Berlinit, është një lajm i keq për Putin, i cili vijon avancimin në Kiev dhe qytete të tjera të Ukrainës.
Perëndimi ka paralajmëruar sanksione të ashpra, por ende nuk duken të tilla për të goditur rëndë Kremlinin. Përjshtimi nga SWIFT, shihet nga ekspertët si një lëvizje që do të vinte në vështirësi diktatorin rus.
