Ish-Kryeministri Sali Berisha, gjatë një takimi elektoral në Shkodër, në mbështetje të kandidatit të “Shtëpisë së Lirisë”, Bardh Spahia, u shpreh se në Shqipëri është asgjesuar vota e lirë.
Berisha tha se 6 marsi është një betejë, e cila do të rikthejë shpresën e shqiptarëve.
Ish-Kryeministri kërkoi votën e shkodranëve për kandidatin Spahia, ndërsa tha se Edi Rama me paratë e krimit dhe sistemin e patronazhistëve, asgjesoi votën e lirë.
Duke folur për rolin e zonjave dhe vajzave, Berisha tha se në vitin 2005, kur erdhëm në pushtet, vajzat dhe gratë kishin numrin më të madh të diplomave universitare, por diferenca në pagë mes burrave dhe grave ishte në masën 36 %, një diferencë e papranueshme, dhe e zbritëm në rreth 17 %, aq sa ishte në vendet anëtare të BE-së.
Berisha tha se vendi sot është në një situatë kritike, ndaj ka nevojë jetike për angazhimin, përkushtimin e zonjave dhe vajzave, në mënyrë që të dalim nga kjo lëngatë që ka pllakosur shoqërinë tonë.
“Me 6 mars ne duhet të shohim të sigurtë drejt një të ardhmeje, por kjo kërkon që të trokasim në çdo derë, në çdo zemër. Ky është revolucion sepse nga Shqipëria është përzënë liria, kjo liri që ekziston është fiktive”, tha Berisha.
Sipas tij, Edi Rama dilte me hekura para televizioneve, duke imituar një serial killer, si Mehmet Shehu, dhe këtë e bënte që të nguliste frikën te qytetarët.
“Arrestoi 38 mijë qytetarë për faturat e dritave dhe ujit dhe këtë e bënte që të frikësonte qytetarët. Ndaj sot për ne është jetike që të bëjmë gjithçka që të shndërrohemi në një shumicë gjigande në Shkodër dhe në mbarë Shqipërinë”, tha Berisha. Sipas tij, regjimi nuk njeh asnjë normë, ja shikoni këtë garë, kur ne kemi një kandidat që e kemi nxjerrë me votën e anëtarësisë, ndërsa regjimi ka nxjerrë një kandidate gjysëm, pasi Edi Rama mori logon tonë me gjykatë dhe polici, dhe ia dha Lulzim Bashës.
“Lul Brava nuk është opozitar, është i marrë peng nga Edi Rama. Ky pushtet i Edi Ramës sulmoi pluralizmin, mori peng me afera dhe probleme të ndryshme kreun e opozitës, dhe sot ai rrëmben logon dhe vendos një kandidat, vetëm e vetëm për të dëmtuar opozitën e vërtetë”, tha Berisha.
Ai tha se 6 marsi është një stacion dhe ne duhet të vazhdojmë revolucionin. Berisha i ka bërë thirrje kandidatit Xhemal Bushati, që garon në logon e PD, që të tërhiqet nga gara, pasi opozita e vërtetë, sipas tij, përfaqësohet nga Bardh Spahia.
“Sot kemi një kauz të drejtë dhe duhet të luftojmë shumë për kauzën tonë”, tha Berisha.
