Përmes twitter, rrufeshëm është shpërndarë lajmi se forcat ruse kanë ekzekutuar ushtarakun shqiptar Emanuel Bazanji në Kiev.
Por lajmi ka rezultuar një fake news.
Gazetari Top Channel Muhamed Veliu bisedoi, me Emanuelin i cili tha se ky është një lajm i pavërtetë.
Përmes Whatsapp kjo është përgjigja e Emanuelit.
“Muhamed se jam i nervozuar dhe në stres, le të shkruajnë çfarë të duan, kur të mbarojë kjo luftë do i shikoj me radhë të gjitha çfarë shkruajnë”, tha ai.
I pyetur për situatën që e rrethon Emanueli tha se: “Është e vështirë shumë sepse jemi goditur nga ajri”.
Ndërkohë në konferencën për mediat, ministrja Olta Xhaçka dhe Kryeministri Edi Rama, thanë se nuk kanë informacione lidhur me atë nëse shqiptarët që ndodhen në Ukrainë janë bërë pjesë ose jo e formacioneve ushtarake ukrainase. Xhaçka foli për një komunitet prej 60 shqiptarësh që jetojnë prej vitesh në Ukrainë dhe kanë krijuar familjet e tyre atje.
Kryeministri Rama tha se nga mediat ka mësuar për një shqiptar, djalë i ri, i martuar në Ukrainë, që i ishte bashkuar formacioneve ushtarake, që ka humbur jetën, por u shpreh se nuk ka informacione zyrtare.
