Lulzi Basha dhe Gazment Bardhi kanë vijuar fushatën elektorale në Lushnje, atje ku kandidon për kryebashkiak në siglën e PD, Indrit Sefa. Në mbështetje të kandidatit Sefa, Basha kërkoi nga lushnjarët që ti bashkohen ndryshimit që vjen me 6 mars. Basha tha se lushnjarët dhe demokratët nuk kanë pse të gënjehen, por të votojnë kandidatin e PD-së, pasi ka vetëm një Parti Demokratike, dhe ajo jemi ne.
Duke iu drejtuar të pranishmëve, Basha tha se shoh njerëz me shpresë që kanë mbushur këtë shesh, ku janë mbledhur qytetarët që kërkojnë ndryshim.
“Në kohë të errëta si këto njerëzit kanë nevojë për shpresë, kanë nevojë për ndryshim”, tha Basha.
Ai u shpreh se e ka për kënaqësi dhe privilegj që sot të mbështesë avokatin Indrit Sefa, i cili ka luftuar kundër padrejtësive. “Indrit Sefa ka pasur një rol vendimtar që bënte dallimin mes padrejtësive dhe drejtësisë, ai është kryebashkiaku i ardhshëm i Lushnjes”, tha Basha. Ai shtoi se Sefa do të punojë për qytetin dhe lushnjarët, që nga familjet e vjetra deri te fermerët në zonat më të largta të kësaj bashkie.
“Indrit Sefa nuk ka vetëm një fytyrë njerëzore, por një moral të lartë, dhe ai është një ofertë e pahumbshme në garën e 6 marsit”, tha Basha.
Ai tha se një nga arsyet kryesore që kemi mbetur këtu është modeli i korrupsionit, i cili buron nga një fytyrë çnjerëzore që nuk ka lidhje me qytetarët e ndershëm, që nuk ka lidhje me hallet tuaja.
Basha u ka bërë thirrje lushnjarëve që të zgjedhin përfaqësimin e duhur. “Ju e dini shumë mirë se çfarë do të thotë kur qytetin e marrin peng bandat dhe të korruptuarit. Eriselda Sefa, kandidatja e PS, ka qenë pjesë e korrupsionit, sepse nuk ka ngritur njëherë zërin për qytetarët lushnjarë. Ndaj është e sprovuar, është e shkuara, le të mbetet e shkuara”, tha Basha.
