Presidenti letonez, Egils Levits tha se kundër Rusisë duhet të vendosen masa ndëshkuese edhe më të gjera si ndëshkim ndaj pushtimit të Ukrainës.
Levits tha se sanksionet e miratuara deri më tani nga Bashkimi Evropian, të cilat synojnë sektorët e energjisë, financave dhe transportit të Rusisë, ishin të ashpra dhe do të kishin një ndikim të rëndësishëm në ekonomi.
Por, sipas tij, Moska duhet të goditet me sanksione edhe më të gjera.
“Gjëja më e rëndësishme është izolimi i këtij regjimi kriminal nga bota, i ngjashëm me Korenë e Veriut. Sepse një regjim i tillë kërcënon jo vetëm Ukrainën, por edhe Evropën dhe gjithë botën”, tha Levits.
Udhëheqësit e 27 shteteve të BE-së ranë dakord për një paketë gjithëpërfshirëse sanksionesh kundër Rusisë në një samit për krizën në Ukrainë.
Letonia dhe dy vendet e tjera baltike, Estonia dhe Lituania, kanë bërë thirrje për përjashtimin e menjëhershëm të Rusisë nga sistemi ndërkombëtar i pagesave SWIFT.
Por disa shtete të BE-së janë rezervuar në marrjen e këtij hapi.
