Ukraina i ka kërkuar Turqisë që të ndërpresë hyrjen ruse në ngushticat e Bosforit dhe Dardaneleve.
Kërkesa e Kievit për të pezulluar hyrjen e anijeve ruse përmes ngushticave u përcoll nga ambasadori i Ukrainës në Turqi, Vasyl Bodnar, i cili gjithashtu loboi për mbylljen e hapësirës ajrore të Turqisë për avionët rusë, njoftoi agjencia e lajmeve “Reuters”.
Masa vjen si kundërpërgjigje ndaj sulmeve ajrore dhe tokësore ruse ndaj Ukrainës mëngjesin e së Enjtes. Ofensiva u quajt një “operacion special ushtarak” nga Presidenti Vladimir Putin.
“Ne po bëjmë thirrje që hapësira ajrore, [dhe] ngushticat e Bosforit dhe Dardaneleve të mbyllen. Kërkesën tonë përkatëse ia kemi përcjellë palës turke. Në të njëjtën kohë, ne duam të vendosen sanksione ndaj palës ruse”, tha ambasadori i Ukrainës Vasyl Bodnar, në një konferencë shtypi në Ankara.
Ngushtica e Dardaneleve siguron hyrje nga Deti Egje në Detin Marmara, dhe ngushtica e Bosforit, përgjatë së cilës është ndërtuar Stambolli, lidh Detin Marmara me Detin e Zi. Ndërprerja e përdorimit të kësaj rruge në thelb do të shkëpuste portet jugperëndimore të Rusisë në bregun verior të Detit të Zi nga Evropa, raporton agjencia e lajmeve “Russian Today”.
Sipas një pakti të vitit 1936, Ankaraja ka kontroll mbi ngushticat dhe mund të kufizojë kalimet e anijeve luftarake gjatë kohës së luftës ose nëse kërcënohet.
Më herët, Presidenti turk Erdogan ka dënuar veprimet e Rusisë në Ukrainë, ndërsa shtoi se qeveria e tij do të përpiqet të ruajë lidhjet si me Rusinë ashtu edhe me Ukrainën.
