Presidenti ukrainas Volodymyr Zelensky, përmes një postimi në Twitter, njofton se forcat ruse po përpiqen të marrin kontrollin e centralit bërthamor të Çernobilit.
“Forcat pushtuese ruse po përpiqen të kapin në Chernobil Centralin Bërthamor. Mbrojtësit tanë po sakrifikojnë jetën e tyre që tragjedia e vitit 1986 të mos përsëritet”, shkroi Zelensky.
Ministria e Jashtme e Ukrainës i bëri jehonë postimit të Zelensky, duke paralajmëruar se një sulm rus në Ukrainë mund të “shkaktojë një tjetër fatkeqësi ekologjike”.
“Në vitin 1986, bota pa fatkeqësinë më të madhe teknologjike në Çernobil”, shkroi ministria në Twitter. “Nëse Rusia vazhdon luftën, Çernobili mund të ndodhë sërish në vitin 2022”.
Shpërthimi në centralin bërthamor të Çernobilit 36 vjet më parë konsiderohet si tragjedia më e madhe bërthamore në historinë e njerëzimit, jo vetëm për shkak të numrit të të vdekurve, por edhe pasojat e rënda që la më pas.
