Policia Kufitare ka sekustruar 80 kilogramë kanabis në Qafë Botë. Lënda narkotike u gjet në një kamionçinë.
Sakaq, policia ka ndaluar drejtuesin e mjetit Aleksandër Azizaj, 45 vjeç, banues në Fier, i cili sipas bluve, po tentonte ta trafikonte drogën në Greqi.
“Si rezultat i kontrollit të imtësishëm dhe të përbashkët të strukturave që operojnë në pikën e kalimit kufitar Qafë Botë, u bë e mundur që në brendësi të kamionçinës të gjendeshin të fshehura 74 pako me lëndë narkotike kanabis (me peshë 80 kilogramë), të cilat u sekuestruan në cilësinë e provës materiale, së bashku me automjetin tip kamionçinë. Drejtuesi i automjetit është shoqëruar në Komisariatin e Policisë Sarandë dhe në përfundim të veprimeve të para hetimore të kryera nga specialistët për Hetimin e Narkotikëve është bërë arrestimi në flagrancë i tij, për veprën penale ‘Trafikimi i lëndëve narkotike’. Në bashkëpunim me Prokurorinë e Rrethit Gjyqësor Sarandë, vijon puna hetimore për identifikimin e personave të tjerë të implikuar në këtë aktivitet kriminal”, njoftoi policia.
