Kryeministri Edi Rama ka mbrojtur deri në fund vendimmarrjen për inceneratorët. Edhe pas 4 orësh dëshmi në Komisionin Hetimor parlamentar, Rama pohoi edhe sikur të ktheje pas në kohë do të kishte të njëjtën vendimmarrje, pra që projektet e inceneratorëve do ti jepeshin Klodian Zotos, Mirel Mërtirit dhe Stela Gugalljas.
Edhe pse më herët tha se emrat e këtyre personave nuk ia kishte çuar njeri në tavolinë para miratimit të vendimit me 17 akte, ai shprehu besimin te ajo që e konsideroi si makineria shtetërore, në vendimmarrjen dhe përzgjedhjen e emrave të mësipërm.
Gjatë dëshmisë në Komision, Kryeministri Edi Rama përgjithësisht ka bërë lojra fjalësh dhe i është përmbajtur idesë se përgjegjësia e kujdo që shkel ligjin është individuale, duke shmangur veten nga përgjegjësia mbi atë që konsiderohet si një nga aferat më të mëdha, por që për kreun e qeverisë është një projekt për të cilin ndjehet krenar.
Rama gjithashtu nuk ka pranuar që Qeveria të ketë financuar me paratë e buxhetit të shtetit inceneratorët e Fierit dhe Elbasanit në masën e 100 mln eurove, por tha se janë dhënë rreth 55.3 mln euro, ndërsa për inceneratorin e Tiranës u shpreh se i gjithë investimi është mbuluar nga privati.
Gjithashtu Rama hodhi poshtë edhe akuzat për pastrim parash.
