Presidenti rus Vladimir Putin tha në një video-mesazh të Mërkurën se interesat e Rusisë janë “të panegociueshme”, megjithatë ai është i hapur për dialog për të zgjidhur “problemet më të vështira”.
“Ne shohim se sa e vështirë po bëhet situata ndërkombëtare, çfarë rreziqesh paraqesin sfidat aktuale si dobësimi i sistemit të kontrollit të armëve apo aktiviteti ushtarak i bllokut të NATO-s”, u shpreh Putin në një video të publikuar nga Kremlini për festën kombëtare ruse.
Putin tha se thirrjet e Rusisë për të ndërtuar një sistem sigurie “të barabartë dhe të pandarë që do të mbronte në mënyrë të besueshme të gjitha vendet”, mbeten pa përgjigje.
Presidenti rus tha se Rusia ka deklaruar gjithmonë se është e hapur për dialog të drejtpërdrejtë dhe të ndershëm, për gjetjen e zgjidhjeve diplomatike për problemet më të vështira.
“Por po e përsëris: interesat e Rusisë dhe siguria e qytetarëve tanë janë të panegociueshme për ne”, theksoi ai.
Kjo deklaratë e Putin vjen dy ditë pasi njohu pavarësinë e dy rajoneve separatiste në Ukrainë dhe një ditë pasi mori miratimin nga Parlamenti rus për të përdorur ushtrinë jashtë vendit. Këto ngjarje kanë nxitur shqetësime në Perëndim, duke i detyruar vendet që të shtojnë sanksionet ndaj Rusisë.
