Kombëtarja shqiptare e futbollit do të luajë më datë 26 mars një miqësore mjaft interesante ndaj një prej skuadrave më të forta në kontinent, Spanjës. Por dueli që është planifikuar të luhet në Katalonjë, në stadiumin e Espanjolit, nuk do të shohë kuqezinjtë e Edi Rejas përballë një ekipi ku do të bëhen testime të shumta siç ndodh rëndom.
Ka qenë vetë trajneri i spanjollëve, Luis Enrike, ai i cili i ka vlerësuar dy ndeshjet miqësore të marsit si pikë kyçe për pjesëmarrjen në Botërorin 2022. Duke folur për mediat spanjolle, ai ka bërë të ditur se sfidat në fjalë do të trajtoheshin si ndeshje zyrtare nga lojtarët e tij.
“Ka shumë tifozë në Katalonjë të cilët kanë dëshirë të shohin ekipin kombëtar. Të kthehesh në Barcelonë është një kënaqësi, si në çdo vend ku ka tifozë me dëshirën për të parë ekipin tonë.
Listë e gjatë? Mbetet ende shumë kohë dhe gjithmonë ka dëmtime, për momentin ka mbipopullim lojtarësh. Shpresoj që të mos kemi dëmtime. Po shohim opsione të ndryshme. Do të jenë ndeshje miqësore, por ne do t’i luajmë si të ishin zyrtare”, ishte kërcënimi i qartë i Luis Enrikes.
