Anëtari demokrat i Komisionit hetimor parlamentar për inceneratorët, deputeti Lefter Gështenja, përmes një postimi në rrjetet sociale shkruan se 430 milionë euro të buxhetit të shtetit kanë përfunduar në xhepat e qeveritarëve të korruptuar dhe shokëve të tyre.
Referuar dëshmisë së dhënë në Komisionin Hetimor nga ish-ministri Shkëlqim Cani, Gështenja shkruan se “Ministria e Financave nën drejtimin e tij refuzoi projektin, pasi nuk ka studim fizibiliteti, vlerësim financiar, procedurë me negociim pa shpallje në kundërshtim me ligjin”.
” Ish-ministri i financave u shkarkua se nuk pranoi të bëhej pjesë e kësaj afere. Një ministër e emëron dhe shkarkon kryeministri, prandaj asgjë nuk është bërë pa dijeninë, mbështetjen dhe miratimin e Edi Ramës.
Ahmetaj e miratoi kontratën e kundërshtuar nga Cani. Ahmetaj ka lidhje të hershme me Mirel Mërtirin. Ka udhëtuar nga 2012-2019, 12 herë me pronarët e inceneratorëve”, shkruan Gështenja.
