Erion Veliaj, kryebashkiak i Tiranës, u shpreh se nuk ka njohje me Klodian Zoton, Stela Gugalljen dhe Mirel Mërtirin. Para Komisionit Hetimor për Inceneratorët, Veliaj tha se shtetasit për të cilët është pyetur i ka njohur nga fotot e publikuara në media, ku ata shfaqen në krah të ish-deputetit Gerti Bogdani, Sekretar i Marrëdhënieve me Jashtë në PD, pak vite më parë.
Veliaj tha se në vitin 2015 u përball me një emergjencë mjedisore, ndërsa plehrat ishin mullar në mes të Tiranës.
Në replikë me Veliajn, Kryetarja e Komisionit Hetimor, Jorida Tabaku, i kujtoi Kryebashkiakut se është në betim, ndaj për deklarata të pavërteta do të përballet me ligjin.
“Përsa kohë jam zgjedhur Kryebashkiak, jam ngarkuar për t´iu kthyer përgjigje palëve të treta. Për Inceneratorin e Tiranës më autorizon ligji”, tha Veliaj.
Por Tabaku, duke iu përgjigjur tha se kompetenca që keni firmosur i përket Këshillit Bashkiak dhe jo juve si Kryebashkiak.
“Ju lutem mos prishni mbledhjen, përgjigjuni pyetjes”, iu drejtua Veliaj, Tabakut, ndërsa kryebahkiaku tha se “nuk më caktoni dot përgjigjen që jap unë”.
“Është e pandershme që të vini këtu dhe të bëni propagandë, ju s´mund të merrni peng Komisionin Hetimor”, tha Tabaku, në replikë me Veliajn.
I pyetur nëse prona ku ndodhet inceneratori i Tiranës ishte ose jo pronë e Bashkisë, Veliaj tha se prona ishte në pronësi shtet. “Bashkia e kishte në përdorim, pronare ishte Qeveria. Nuk mund të pyetet Këshilli Bashkiak për një pronë që nuk ishte pronë e Bashkisë. Ka një vendim të Këshillit Bashkiak”, tha Veliaj.
“Erion Veliaj në kundërshtim me ligjin për vetëqeverisjen vendore ka dhënë miratimin për projektin e inceneratorit të Tiranës, në një kohë kur kjo kompetencë i takonte Këshillit Bashkiak të Tiranës”, tha Tabaku.
Tabaku duke replikuar me Veliajn i tha ” mos bëni si viktimë, se nuk jeni i tillë”.
“Unë me ju kam fituar çdo betejë ligjore dhe jeni dënuar për shpifje”, reagoi Veliaj, duke u shprehur “vini në komision të papërgatitur, ndaj flisni për legjenda urbane, sikur unë kam folur në emër të Qarkut, ndërkohë që unv kam folur për bashkinë”.
Veliaj ka publikuar një dokument, të firmosur nga Isa Sakja, ish-kryebashkiak i Kavajës, ku shpreh dakordësinë e tij lidhur me inceneratorin. “Isa Sakja angazhohet për të përmbushur kontratën”, tha Veliaj, duke cituar një shkresë të firmosur nga Isa Sakja.
Debatet
Jorida Tabaku: Në datën 27.03.2017 kërkesës së Alqi Bllakos për projektin e inceneratorti të Tiranës, të cilën ne e kemi administruar këtu si shkresë, jeni shprehur pro. Cila pikë e cilës gërme, e cilit nen të ligjit Nr.139 të vitit 2015 “Për vetëqeverisjen vendore”, ju autorizon ta bëni këtë si kryetar i bashkisë Tiranë?
Veliaj: Më autorizon pika 12 e ligjit 10463, 23.09.2012 i qeverisë “Berisha” që sipas studimit të fizibilitetit referohet dhe parashikon se pika 12 “kryetarët e qeverisjes vendore, janë përgjegjës për administrimin e mbetjeve që krijohen brenda territorit të tyre administrativ në përputhje me kërkesat e këtij ligji” . kam zbatuar një ligj që shumica juaj ka aprovuar në parlament.
Tabaku: Ky ligj siç e thatë edhe ju është për menaxhimin e integruar të mbetjeve. Ju keni një ligj që organizon qeverisjen vendore, që ka kompetenca të ndara mes trupave të ndryshme, institucioneve të ndryshme dhe që i ka kompetencat e ndara. Cila pikë, e cilit nen që unë përmenda në ligjin Nr.139 “Për organizmin e pushtetit vendor”, ju ka autorizuar ju për këtë veprim?
Veliaj: Më ka autorizuar pika 1 e nenit 5 të ligjit Nr.139 “Për vetëqeverisjen vendore i ndryshuar”, në germën “gj” të nenit 64 përcakton se “ushtron të drejtat dhe siguron plotësimin e të gjitha detyrimeve që i janë ngarkuar bashkisë si person juridik dhe është përfaqësuesi i saj në marrëdhëniet me të tretët. Per sa kohe qe jam zgjedhur kryetar i bashkisë.
Tabaku: Sipas pikës 5 qe ju referuat ju nuk e keni kete kompetence qe keni firmosur kete shkrese. Ju keni kompetenca qe nuk i ka Keshilli Bashkiak. Kjo është nje kompetence qe i takon Këshillit Bashkiak.
