Replika të forta janë zhvilluar mes kryetares së Komisionit Hetimor për inceneratorët, Jorida Tabakut, dhe kryebashkiakut Erion Veliaj.
Ky i fundit i ka kujtuar Tabakut lejen e ndërtimit që ka firmosur për familjarët e saj.
“Ti merresh me ndërtime, jeni përfituese, ju kam firmosur lejen e ndërtimit për familjen tuaj të nderuar te fusha e Aviacionit”, tha Veliaj, duke iu drejtuar Tabakut.
Deputetja demokrate mohoi që të ishte ndërtuese, që të kishte marrë ndonjë leje ndërtimi apo të ishte përfituese.
“Po gënjeni, familjarët e mi mund të hetohen dhe kontrollohen, nuk më intimidoni dot”, tha Tabaku.
Tabaku u shpreh se Veliaj refuzon t’i përgjigjet pyetjes se cili është vendimi i përcaktimit të tarifës së dherave që i ka dhënë inceneratorit të Tiranës, 45 mln euro.
“Turp është të vjedhësh siç ke bërë ti”, i tha Tabaku, Veliajt.
Kryebashkiaku në vijim të replikave i tha “po qetësoju se do sëmuresh, do bëhesh me tiroide”.
