Policia e Tiranës njofton se tetë efektivë janë dëmtuar gjatë përplasjes me banorët te zona e “5 Majit” në Tiranë, ku autoritetet po shembin disa banesa.
“Sot në orët e para të mëngjesit, në zbatim të vendimit për shembjen e disa banesave në rrugën ‘5 Maji’, gjatë rezistencës së banorëve, janë dëmtuar në detyrë 5 punonjëse të Policisë së Shtetit dhe 3 punonjës të Policisë Bashkiake. Ata kanë marrë dëmtime nga sende të forta dhe lëndë djegëse dhe ndodhen në Spitalin e Traumës, duke marrë ndihmën mjekësore”.
Burime zyrtare bëjnë me dije se në terren kanë zbarkuar forcat speciale të FNSH.
“Strukturat e DVP Tiranë, të angazhuara në planin e punës, në mbështetje të strukturave të IMT-së dhe Policisë Bashkiake, janë mbështetur më pas nga FNSH q ëkanë normalizuar situatën dhe kanë krijuar mundësinë për vijimin e shembjeve”.
Policia e Tiranës sqaron se ka shoqëruar disa persona në Komisariat, ndërsa paralajmëron se “cilido që ka ushtruar dhunë ndaj punonjësve të Policisë, do përballet me ligjin”.
Policia apelon “për këdo të ndalë e shmangë aktet e dhunës mbi forcat e rendit, në të kundërt do të përballen me forcën e ligjit”.
