Partia Demokratike ka hedhur akuza në drejtim të Tom Doshit i cili sipas tyre po bashkëpunon me Edi Ramën në Shkodër.
Sekretari i Partisë Demokratike Gazment Bardhi, ka publikuar në rrjetet sociale një video, ku shihet ish-deputeti i Partisë Socialiste Tom Doshi, i cili shpreh mbështetjen për kandidaten e PS-së në Shkodër, Majlinda Angoni.
Reagimi nga Gazment Bardhi:
“Edi Rama ia ka dhënë të gjitha pushtetet në dorë Tom Doshit në Shkodër. Ai kontrollon gjithçka: Çdo tender, çdo emërim, çdo kandidim. Siç e konfirmon dhe vetë në këtë video, është ai që ka zgjedhur edhe kandidaten e PS për bashkinë e Shkodrës.
Edhe pse i shpallur non grata nga SHBA, Edi Rama po bashkëpunon ngushtë me Tom Doshin, duke e emëruar atë de fakto si shefi politik dhe drejtuesi i fushatës së kandidates së PS në Shkodër.
A ka poshtërim më të madh për socialistët shkodranë që kandidaten t’jua caktojë Tom Doshi?
Por në 6 mars shkodranët do votojnë me dashni për Shkodrën, do votojnë Partinë Demokratike, do zgjedhin Xhemal Bushatin si kryetarin e ri të bashkisë!”, shkruan Bardhi.
