Kryetarja e komanduar e Bashkisë së Durrësit, Emiriana Sako, braktisi Komisionin Hetimor për inceneratorët, ku ishte e thirrur për të dëshmuar këtë të Hënë.
Sako u ankua se nuk po lejohej të shprehej, ndërsa disa nga pyetjeve të deputetëve të mazhorancës iu shmang, duke u shprehur: Përgjigjen do e merrni më 6 Mars.
Kështu, Sako nuk iu përgjigj pyetjes së Ina Zhupës se pse fillimisht me landifillin e Sharrës për të cacur mbetjet atje u procedua pa kontratë, e më pas u lidh një tender. Ajo u akuza nga Zhupa për shkelje të proceduarave të tenderit në fjalë, ndërsa më herët Jorida Tabaku u shpreh se ka pasur presione ndaj Sakos që mbetjet e Durrësit ti çojë në Sharrë, në mënyrë që të përfitojë kompania që ka marrë inceneratorin e Tiranës.
Nga ana tjetër, drejtuesja e komisionit hetimor Jorida Tabaku paralajmëroi kallëzim penal ndaj Sakos për mos dhënien e dëshmive në komision.
Pas largimit të kryebashkiakes së Durrësit, deputeti Belind Këlliçi tha se Sako i mori urdhrat me celular, ndërsa tha se shumë pyetje mbetën pa përgjigje nga Sako e cila “një personi në kërkim ndërkombëtar (Klodian Zoto) i ka dhënë 200 mijë euro”.
Nga ana tjetër, deputetët e mazhorancës akuzuan ata të opozitës për shkelje të proceduarave gjatë seancës së pyetje-përgjigjeve të Sakos.
Më herët në komision ishte Valbona Ballgjini, ish-anëtarja e Komisionit të Prokurimit të Inceneratorit të Tiranës e cila nuk pranoi të dëshmojë.
Po ashtu, Ermonela Felaj paralajmëroi kallëzim penal në SPAK për Jorida Tabakun për takimin me kreun e këtij institucioni Arben Kraja. Ajo tha se Tabaku s’mori lejen e komisionit për tu takuar me Krajën. Tabaku nga ana tjetër, sqaroi se takimi erdhi pasi javën e kaluar një nga anëtarët e mazhorancës në komision, Arben Pëllumbi, shprehu shqetësimin se si informacionet në mbledhje ndikojnë punën e SPAK.
