Ish-ministri i Financave Shkëlqim Cani, sipas disa raportimeve mediatike, është detyruar të kërkojë dorëheqjen te kryeministri Edi Rama, pasi nuk ishte dakort të jepte firmën e tij për të vijuar me procedurat për inceneratorët.
Këtë të Hënë, Cani ishte në komisionin hetimor për inceneratorët si dëshmitar, ku shpjegoi se si ministër, refuzoi procedurat e ndjekura për ndërtimin e inceneratorëve të Elbasanit dhe Fierit, pasi kishin mospërputhje me ligjin.
Ai u pyet nga deputeti demokrat Helidon Bushati nëse u detyrua të jepte dorëheqjen për kundërshtitë e tij për inceneratorin e Fierin.
“Meqenëse disa ditë më përpara ishte një person tjetër që po dëshmonte, ju referova letrave tuaja dhe thashë një ministër konservator si Cani, kolegët janë këtu dëshmitarë. Tani, mos vallë ky konservatorizmi juaj ka çuar në muajin Shkurt të 2016-ës që të kërkojë dorëheqjen nga kryeministri pikërisht për të mos të bllokuar Fierin”, pyeti Bushati.
Në përgjigje, Cani ‘u dhuroi’ deputetëve të komisionit një qeshje “vesh më vesh”.
Pyetjen e Bushatit e komentoi më pas gjatë seancës edhe deputeti Belind Këlliçi: “Është një pyetje retorike dhe kam përshtypjen se çdo qytetar e ka të qartë se pse u larguat”, tha ai.
