Qeveria ka nisur investimet elektorale në kuadrin e zgjedhjeve të pjesshme vendore të 6 marsit, ku në 6 bashki do të zgjidhen kryebashkiakët e rinj.
Taulant Balla, drejtues politik i fushatës së PS-së në Bashkinë e Lushnjes, i shoqëruar nga Eriselda Sefa dhe Haki Çako, drejtor i Emergjencave Civile, u shfaqën në fshatin Thanasaj, atje ku kanë nisur punimet për vendosjen e pritave në lumin Shkumbin, me qëllim parandalimin e përmbytjeve.
“Bashkë me kryetaren e Bashkisë, Eriselda Sefa pamë nga afër punën që po kryhet për ndërtimin🚧 e pritës mbi Lumin Shkumbin në #Thanasaj. Ndërtimi i pritës lumore ishte një nevojë emergjente, pasi sa herë kishte reshje, lumi rrezikonte përmbytjen e banesave të banorëve të kësaj zone”, shkruan Balla në rrjetin social.
Ai shprehet se tani nuk jemi më në kohën e shpresave, por veprave. Nuk dihet pse këto prita që po bëhen sot në kohë fushate nuk janë ngritur më parë, pasi kandidatja e PS për Bashkinë e Lushnjes, drejton këtë institucion si e komanduar pas arrestimit të kryebashkiakut që mori mandatin në votimet e qershorit 2019.
