Ish-Kryeministri Sali Berisha, i pranishëm në një ceremoni të organizuar në “Qytetin Studenti” me rastin e 31 vjetorit të rrëzimit të bustit të diktatorit Enver Hoxha.
Berisha tha se një nga qëndresat më historike ishte greva e 700 studentëve, të ngujuar në këtë ndërtesë, të vendosur në vetëflijim, dhe këtë e bënë në mbrojtje të pluralizmit politik të vërtetë, kundër kultit të Enver Hoxhës.
Ish-Kryeministri tha se Enver Hoxha instaloi një nga diktaturat më të egra, ndërsa u burgosën, internuan dhe ekzekutuan me mijëra njerëz.
“Në asnjë diktaturë tjetër, nuk u përjetua ajo diktaturë që ndodhi në Shqipëri, ku u instalua edhe ajo e urisë”, tha Berisha.
Ai tha se kulti i Enver Hoxhës u ngulit në thellësitë në qeniet shqiptare, përmes izolimit të thellë, duke u aplikuar diktatura e izolimit, si forma më e egër e diktaturës.
“Rrëzimi i kultit të Enver Hoxhës ishte kushti i të gjitha kushteve që opozita të ishte një opozitë e vërtetë, që shqiptarët të rifitonin dinjitetin njerëzor të munguar dhe të ishin njerëz të lirë”, tha Berisha.
Ish-Kryeministri i konsideroi studentët e dhjetor ´90 si batalionin e sulmit ndaj kultit të individit.
“Nisi kjo lëvizje në Universtin Bujqësor, ku nisi greva kundër regjimit, konkretizuan kërkesat ultimative për Ramiz Alinë, ndërsa studentët e Universitetit të Tiranës u ngritën në këmbë dhe morën flamujt për betejën finale”, tha Berisha.
