Java që sapo u mbyll ka regjistruar numrin më të ulët të rasteve aktive me Covid-19 krahasaur me pothuajse 4 muajt e fundit. Por kjo nuk mund të thuhet për fatalitetet që vijojnë të mbeten në nivele të larta, krahasuar me rastet e reja të deklaruara.
Bazuar në shifrat zyrtare të Ministrisë së Shëndetësisë, në 6 ditët e fundit janë regjistruar 1860 raste të reja me Covid-19, me një ulje prej rreth 65 % krahasuar me javën e mëparshme.
Ndërkohë numri i fataliteteve është 24.
Sipas shifrave zyrtare, aktualisht në Shqipëri janë 4928 raste aktive, ndërsa Tirana vijon të mbetet qarku me numrin më të lartë të pacientëve të infektuar, edhe pse ka një rënie të ndjeshme.
Në Tiranë janë 1638 pacientë aktivë, ndërsa Fieri numëron 769 të tillë. Elbasani dhe Vlora janë dy qarqet e tjera me numrin më të lartë të pacientëve aktivë, përkatësisht 479 dhe 468 persona.
Ndërkohë Dibra është qarku me numrin më të ulët të pacientëve aktivë, ku numërohen vetëm 21 të tillë.
Në spitalet COVID po marrin trajtim 88 pacientë, shifër kjo nga më të ulëtat e muajve të fundit, por numri i pacientëve që janë në gjendje të rënduar mbetet i lartë, Bazuar në shifrat zyrtare në spitalet Covid ndodhen 15 pacientë në gjendje më të rënduar.
