Ish-Presidenti Bujar Nishani iu drejtua me një apel demokratëve të 6 bashkive ku do të mbahen zgjedhjet e pjesshme vendore për të mbështetur kandidatët e koalicionit “Shtëpia e Lirisë”.
Nishani shkruan se me datën 6 mars demokratët e Durrësit, Shkodrës, Peshkopisë, Lushnjes, Vorës dhe Rrogozhinës do të përfaqësojnë vullnetin dhe reagimin e shpirtit të vrarë, të tradhëtuar, të fyer të të gjithë demokratëve anë e kënd Shqipërisë prej 8 vitesh nga një parazit politik i cili jo vetëm aktroi teatrin më të shëmtuar mbi vuajtjet, dhunimin e keqtrajtimin e qindra-mijëra votuesve opozitarë, por na solli për herë të parë mes nesh modelin e ulët të peng-opozitës kapur prej aferash të turpëshme korruptive.
Sipas tij, më 6 mars, demokratët e 6 bashkive kanë rastin ti “përplasin në fytyrë” votën e dinjitetit, një tufe të korruptuarisht prej tenderave qeveritarë, lejeve të ndërtimit prej pazaresh të turpëshme, apo prej zarfave të rrogave ilegale !
“Por 6 marsi është rasti që edhe mijëra qytetarë të tjerë në ato 6 bashki të shpagojnë lukuninë e një qeverije që trashet me pasuri ndërsa shqiptarët grabiten tek çmimet e ushqimit të përditëshëm që rritet, faturat e ujit dhe energjisë që shtohet, nafta e makinës që kërcen “kacafiu”, spitali që lëngon për faqe të zezë, trafiku në rrugë që është makth, papunësia një plagë që shkon thellë e më thellë.
Troç të themi, tortura sociale është dhurata e përditëshme qeveritare për njerëzit e thjeshtë.
6 marsi është një mundësi, ti japim aq sa mundemi për këtë rast shpagimin hajnisë dhe tradhëtisë, mashtruesve dhe ligësisë.
Poshtërsia nuk mundet të kthehet kurrë në vlerë”, shkruan Nishani.
