Vijon të mbetet mister vrasja e kryer disa ditë më parë, por e zbuluar ditën e djeshme, e ish-ushtarakut Altin Alikaj, 46 vjeç.
Nga raportimet mësohet se policia e Vlorës ka marrë në pyetje mbi 15 persona, mes tyre familjar, miq, banorë të lagjes, lidhur me ngjarjen, por nga dëshmitë e tyre, nuk janë zbuluar detaje që mund të çojnë në zbardhjen e krimit.
Dëshmitë në komisariatin e Vlorës të këtyre personave konfirmojnë faktin se ish- nënoficeri në repartin ushtarak prej vitit 2004 ishte përdorues droge dhe shpesh herë si një i tillë kërkonte dhe borxhe. Familjarët shprehen se nuk kanë dijeni për asnjë konflikt që mund të ketë 46 vjeçari.
Ngjarja mendohet të ketë ndodhur natën dhe përsa i përket dinamikës së saj tregohet se mund të kenë qenë dy ose më shumë persona. Fillimisht janë afruar pranë banesës së tij ku kanë helmuar qenin e komshiut me ushqim të helmuar dhe më pas kanë prerë edhe automatin e dritave.
Dyshohet se autori ose autorët janë futur duke kaluar murin e banesës dhe duke përdorur forcë për hapjen e dyerve. Ekspertiza nxjerr në pah se 46-vjeçari është qëlluar nga një distancë e afërt me armë zjarri të llojit pistoletë në shpatull nga krahu zemrës dhe ka të çara në pjesën e kafkës të cilat mund të jenë shkaktuar nga sëpata e cila është gjendur në banesë me njolla gjaku.
Dyshohet se përpara se ta vrisnin mund edhe ta kenë lidhur. Alikaj u shpall i zhdukur në datën 11 shkurt teksa hije dyshimi shfaqen edhe në faktin se në 8 ditë që ka marr denoncimin për humbjen e tij, policia e Vlorës nuk ka kontrolluar asnjëherë banesën e viktimës.
Denoncimin e ka bërë kushëriri i tij në datën 11 shkurt teksa vrasja mund të ketë ndodhur pak ditë përpara kësaj date. Kohë më përpara vrasjes 46-vjeçari kishte qenë në Kosovë teksa i kishin marrë edhe pasaportën, më pas ky i fundit kishte hyrë ilegalisht në Shqipëri.
Pistat e hetimit sigurish që kryesorja mbetet prishja e pazareve të drogës si dhe borxhet që ky i fundit mund të ketë pasur te tjerë personave por nuk përjashtohet as fakti që 46 vjeçari të jetë vrarë edhe për ndonjë informacion që dinte, ku në këtë pistë më tepër dyshimet i shtoj fakti që në banesën e tij nuk është gjendur celulari që përdorte.
Në zonë nuk ka kamera sigurie pasi po flasim për një lagje periferike të Vlorës dhe në atë orar e gjithë zona është në terr te plotë. Fqinjët shprehen se nuk kanë dëgjuar asnjë zhurmë që mund ti bënte ata të dyshonin se në banesën e Altin Alikajt të ndodhte krimi. Policia ndërkohë vijon hetimet ku janë sekuestruar kamera të sigurisë në distancë të largët me banesë për të zbuluar lëvizjet e mundshme të 46-vjeçarit pak ditë përpara ngjarjes.
