Altin Alikaj, ish-ushtaraku i cili u gjet i pajetë në banesë në lagjen “24 Maji” të Vlorës, dyshohet se është vrarë.
“Nga këqyrja paraprake në trupin e shtetasit Altin Alikaj janë konstatuar dëmtime të ngjashme, si ato të shkaktuara me armë zjarri. Trupi i viktimës ndodhet në morgun e Vlorës, për ekzaminime të mëtejshme. Grupi hetimor, nën drejtimin e Prokurorisë, po punon për dokumentimin e plotë të ngjarjes dhe grumbullimin e provave që do të çojnë në identifikimin e autorit/ve të ngjarjes”, njoftoi policia.
46-vjeçari kishte dy javë që nuk komunikonte me familjen e tij dhe 8 ditë i zhpallur i humbur.
Ai është gjetur këtë të Shtunë. Ka qenë nëna e tij, e cila e ka gjetur sot 46-vjeçarin pa jetë brenda shtëpisë së tij, e cila ishte vetëm pak metra nga shtëpia e prindërve të tij. Në shtëpinë e viktimës janë helmuar më herët qentë e komshinjve, është prerë automati i dritave dhe në banesë është gjetur një sëpatë me gjurmë gjaku.
Familjarët kanë ngritur dyshime se 46-vjeçari mund të jetë vrarë, kjo pasi në kokë e në trupin e tij janë gjetur shenja dhune, të çara e fraktura. Trupi i pajetë i tij është dërguar në morg, ku aktualisht po merret mjekësia ligjore.
46-vjeçari raportohet se ka qenë përdorues i lëndëve narkotike. Ai jetonte vetëm, ndërsa prindërit shumicën e kohës jetonin në Greqi. E ëma e viktimës raportohet se ishte kthyer nga Greqia pikërisht ditën e sotme.
