Ambasadorja amerikane Yuri Kim ka zgjedhur të kalojë fundjavën në Shkodër. Diplomatja amerikane prej ditës së premte dhe gjatë ditës së sotme ka qenë në kryeqendrën e veriut, Shkodër, qytet të cilin e quan si një nga vendet e saj të preferuara në Botë.
Kim shprehet se është e lumtur të vizitojë disa destinacione të veçanta në Shkodër dhe të kalojë kohë me shkodranët duke i cilësuar njerëz mikpritës me stil dhe përsosje kulturore.
“E lumtur të kthehem në një nga vendet e mia të preferuar në botë, Shkodër. Isha këtu me disa miq për të vizituar disa vende të rëndësishme si Kalaja e Rozafës e cila ka qëndruar për shekuj si dëshmi e trimërisë së Shkodrës.
Këndi i Kujtesës së na kujton krimet e diktaturës komuniste dhe rezistencën e popullit të Shkodrës dhe muzeun e fotografisë Marubi i cili ka imazhe të bukura dhe të jashtëzakonshme të Shqipërisë së shekullit të 19-të dhe fillimit të shekullit të 20-të.
Mbi të gjitha ishte kënaqësi të takohesha dhe të kaloja kohë me shkodranët të cilët shquhen për mikpritjen, stilin, përsosjen kulturore dhe pavarësinë. Unë i dua shkodranët”, shkruan Yuri Kim.
Vizita dhe qëndrimi i Kim në Shkodër ka përkuar me hapjen zyrtare të fushatës për zgjedhjet e pjesshme vendore të 6 marsit, ku qytetarët e 6 bashkive do të zgjedhin kryebashkiakët e tyre, dhe Shkodra është një nga bashkitë ku do të ketë zgjedhje. Gjithsesi diplomatja duket se ka pasur në qendër të vizitës disa nga atraksionet turistike të qytetit.
