Viola Haxhiademi, Sekretare e Përgjithshme e MIE, ishte dëshmitarja e parë që u pyet sot në Komisionin hetimor lidhur me Inceneratorët.
Haxhiademi tha se vlera e paguar nga buxheti i shtetit për impiantin e Elbasanit ishte reth 21,6 milionë euro pa TVSH, për atë të Fierit rreth 27,5 milionë euro, ndërsa për impiantin e Tiranës nuk paguhen para nga buxheti i shtetit për ndërtimin.
Debatet që shoqëruan dëshminë e Haxhiademit, sollën reagimin e socialistëve në komision. Deputeti Eduard Shalsi kërkoi pezullimin e seancës së marrjes në pyetje, për shkak të shkeljeve nga ana e demokratëve të cilët, sipas Shalsit, bëjnë interpretime dhe komente të përgjigjeve të dëshmitarëve.
“Fjalën tymnajë sot e hodhi për herë të parë Edi Rama dhe në komision të gjithë në unison”, iu përgjigj Tabaku, duke refuzuar kërkesën për pezullimin e punimeve.
Pjesë nga marrja e dëshmisë së Viola Haxhiademit
Jorida Tabaku: Në rastin e Fierit, është dhënë pagesa për punime të pakryera, e thotë vetë buxheti. Për tri vite nuk është ndërtuar në Fier, e kanë deklaruar vetë, 20 milionë euro punime të pakryera. Është shkruar në bilancin zyrtar, dorëzuar në QKB.
Viola Haxhiademi: Mos keqinterpretoni, situacione ka, janë të certifikuara dhe të firmosura nga personat përgjegjës.
Tabaku: Në momentin që po hetohet për inceneratorin e Fierit a nuk është vepër penale të vazhdoni me pagesat?
Haxhiademi: Nuk jam në dijeni të këtyre detajeve. Nuk mund të bëj komente për këtë çështje.
