Ish-Kryeministri Sali Berisha u shpreh sot nga Dibra se në 6 mars shqiptarët duhet të votojnë për ndryshimin. Berisha tha se në 5 vite, socialistët sollën në Dibër 6 kryebashkiakë, bashkë me këtë që ka sjellë Ulsiu.
Lidhur me ndërtimin e Skavicës, Berisha tha se ta harrojnë se mund të përmbytin Dibrën.
“Po ua them që HEC i Skavicës që përmbyt, qoftë edhe një pëllëmbë tokë, nuk do të pranohet”, tha Berisha, duke i bërë thirrje Edi Ramës të tërhiqet.
Berisha akuzoi Lulzim Bashën se e ka mendjen të ndajë pushtetin dhe qeverisjen me Edi Ramën.
“Basha tradhëtoi demokratët. Ju në Maqellarë kapët njërin që blinte votat dhe unë ju falenderoj, po ku është sot ai? Është i lirë, sepse Lulzim Basha ju tradhëtoi, sepse e kishte mendjen si të qeveriste me Ramën, por në fakt ai është peng i Edi Ramës”, tha Berisha.
Lidhur me dosjen Toyota Yaris, Berisha tha se Edi Rama i mbylli dosjen Lulzim Bashës dhe e mori peng, ndërkohë Prokuroria belge, do i shkojë deri në fund problemit.
“Por aferat mes Bashës dhe Ramës janë të tmerrshme. Ata janë bashkë edhe në aferën e Portit të Durrësit, janë bashkë edhe te kullat që duan të ndërtojnë te selia e PD”, tha Berisha.
Ish-Kryeministri u shpreh se Lulzim Basha nuk është lider, e çoi PD nga humbja në humbje. “I them këtu Naim Gazidedes mos shko pas qerres se Lul Bravës, çdo votë për të, është votë që i mungon Partisë Demokratike. Ne jemi demokratët e vërtetë, pasi Lul Brava mban peng logon dhe selinë me policët e Edi Ramës”, tha Berisha.
