Ish-Kryeministri i cilësoi banorët e Bubullimës në Lushnje njerëz të mrekullueshëm të punës dhe dijes. Në kuadrin e fushatës elektorale për zgjedhjet e pjesshme të 6 marsit, Berisha tha se kërkon votat e qytetarëve të Bubullimës dhe lushnjarëve, për kandidatin Elton Bano, i cili do t´ju përfaqësojë me dinjitet.
Berisha tha se me 6 mars ju duhet të riktheni shpresën jo vetëm për veten tuaj, por për tv gjithë shqiptarët. Ish-Kryeministri akuzoi Edi Ramën për mashtrimin që i ka bërë shqiptarëve dhe fermerëve, në veçanti.
Duke u ndalur te kandidatja Emiriana Sefa (PS), Berisha tha ata që e kishin Bashkinë e Lushnjes edhe me naftën abuzonin. “Në vend që nafta të vinte te ju, nafta vidhej”, tha Berisha. Sipas tij, këto zgjedhje janë vërtet lokale, por domethënia e tyre është jashtëzakonisht e madhe.
Berisha tha se kemi nisur një revolucion kundër narko-shtetit. “U arrestuan nga ky narkoshtet 38 mijë qytetarë për faturat e dritave, dhe këtë e bënte vetëm që të frikësonte qytetarët. Ne e kemi nisur revolucionin dhe do e fitojmë, por vota juaj për Elton Banon ka një rëndësi të jashtëzakonshme”, tha Berisha.
Lidhur me kandidatin që garon në siglën e PD, Indrit Sefa, Berisha tha se është kopje e Lulzim Bravës. “Unë nuk e njoh atë personalisht, por nëse donte të kandidonte mund të hynte në garën e primareve, por ai kishte frikë nga vota dhe donte vetëm emërim”, tha Berisha.
“Bano do të jetë një shërbëtor i përulur i juaji dhe mbarë qytetarëve të Lushnjes, duke iu ofruar shërbimet më të mira të mundshme.
Duke votuar Elton Banon ju shkëputeni nga një administrim shumë vjecar, i cili ka qenë abuziv në Bashkinë e Lushnjes.
Me 6 mars me votën tuaj, keni mundësi që të jepni sinjalin e parë të shkëputjes nga një situatë e përkeqësuar që nisi prej vitit 2013-ës.
Rrogat dhe pensionet në vitin 2013 ishin më të lartat në të gjithë Rajonin, përfshi edhe Rumaninë dhe Bullgarinë, dhe kështu ne rritëm shpresën e qytetarëve. Por ju jeni dëshmitarë, çfarë investimesh janë bërë në Lushnje nga 2013 deri më sot?
Të rinjtë dhe fermerët janë më të pambështeturit nga Qeveria Rama. Të rinjtë po ikin jashtë, fermerët po falimentojnë”, tha Berisha.
Ai u shpreh se në 2013 eksportohej qumësht, ndërsa sot ne importojmë. “Sot fermerët po therin lopët, sepse asnjë subvencion nuk i jepet. E gjithë Bota u jep subvencione fermerëve, ndërsa këtu zero subvencione, dhe kemi rritje të imputeve bujqësore dhe blegtorale”, tha Berisha.
