Ndryshimi i Kupës së Botës, me synimet nga FIFA për ta bërë çdo dy vjet ka ngjallur reagim të fortë. Prej muajsh pjesa më e madhe e emrave të mëdhenj të futbollit apo specialistë janë shprehur kundër ndryshimit të formatit aktual.
Tashmë në diskutime po përfshihet çdo faktor teksa FIFPro, Sindikata Botërore e Futbollit ka zhvilluar një sondazh ku të jenë vetë lojtarët që të kenë fjalën e fundit për diçka të tillë pasi janë ata që preken direkt nga këto ndryshime.
Siç njofton FIFPro, janë mbi 1 mijë futbollistë profesionistë që janë pyetur për ndryshimet e propozuara dhe 77% e lojtarëve që luajnë në Europë dhe në Azi kanë kërkuar që Kupa e Botës të mbetet çdo 4 vite.
Gjithashtu 63% e lojtarëve të pyetur që luajnë në kontinentin amerikan kanë shprehur mbështetjen e tyre për të mbajtur çdo 4 vjet Kupën e Botës.
Kjo mbështetje për të ruajtur këtë format të Botërorit bie vetëm në kontinentin afrikan ku 49% e lojtarëve të pyetur kanë shprehur dëshirën që të jetë çdo 4 vite.
