Deputeti demokrat Edmond Spaho e konsideroi si skandal atë që ndodhi dje në Komisionin Hetimor parlamentar të inceneratorëve, kur u tentua të mos lejohej nga deputetët e PS-së, dhënia e dëshmisë së gazetarit Jetmir Olldashi.
Spaho tha se është e turpshme që deputetët socialistë u rreshtuan në krah të Mirel Mërtirit, person i shpallur në kërkim nga SPAK, për ti mbyllur gojën gazetarit Olldashi.
“Po kështu është e turpshme që edhe media nuk reagoi ndaj një skandali të tillë, kur u tentua mbyllja e gojës së gazetarit, duke përdorur si argument, një vendim gjykate që paska dënuar gazetarin në një proces gjyqësor të nisur nga Mirel Mërtiri.
Kjo është e turpshme, pasi konflikti i interesit është krejt gjë tjetër, në konflikt interesi janë ato që tentojnë të mbulojnë dhe mbrojnë këtë vjedhje, këtë aferë korruptive”, tha Spaho.
Sipas tij, nisur edhe nga seanca e djeshme, ku deputetët e PS janë në konflikt të plotë interesi, ndaj kam frikë se edhe ky komision do të dështojë.
“Kemi një bashkim të deputetëve të PS me ato që janë përfshirë në këtë aferë. Sot seanca duhej të niste me dëshminë e gazetarit dhe jo të bëheshin ato skena që u bënë dje”, tha Spaho.
Të njëjtin qëndrim deputetët e PS mbajtën edhe në rastin e gazetarit Artan Rama, të cilin nuk e lejuan të japë dëshminë meqë ai ishte në një proces gjyqësor me Mirel Mërtirin.
Lexo edhe:
Hetimi i inceneratorëve, Spaho largohet nga Komisioni: E pamundur nxjerrja e fakteve
