Nga Boldnews.al
E turpshme, në përmasat e një skandali, mund të konsiderohet ajo që ndodhi sot në Komisionin Hetimor parlamentar për inceneratorët, kur deputetët socialistë, pavarësisht emrave, peshës apo ngjyrës së flokëve, komandohen me sms, që mbërrijnë në telefonat e tyre.
Ndoshta nuk është hera e parë, por as e fundit, kur deputetët komandohen në vendimmarrjet e tyre përmes mesazheve, por sot diçka e tillë ndodhi hapur, në sytë e publikut dhe mediave.
Ishim mësuar të shikonim deputetë që komandoheshin për votën e tyre, qoftë edhe për ato që konsiderohen si çështje me interes kombëtar e ndërkombëtar, por kurrë nuk kishim parë komandim për ti mbyllur gojën një gazetari, të thirrur si dëshmitar, për një aferë që kalon përmasat dhe mandatin e një qeverie.
Në momentin që në Komisionin Hetimor parlamentar u ul për të dëshmuar gazetari Jetmir Olldashi, brenda pak sekondash, në telefonat e deputetëve socialistë mbërriti një sms. Gazetari nuk duhej lejuar për të dhënë dëshmi, dhe këtë rol, e mori Arben Pëllumbi. Mund ta luante këtë rol edhe Eduart Shalsi, Etjen Xhafaj, Besian Ajazi apo Antoneta Dhima, por duket se Pëllumbit i shkon më shumë edhe për shkak të mbiemrit.
Dhe për tu bërë qesharak deri në fund, Pëllumbi noxri si argument atë se gazetari ishte dënuar nga Gjykata e Tiranës, pas një padie që ka bërë Mirel Mërtiri, një personazh i shpallur në kërkim nga SPAK, i përfshirë në aferën e inceneratorëve, e cila po hetohet jo vetëm nga Prokuroria Speciale, por edhe nga Parlamenti, përmes një Komisioni ku bën pjesë edhe ky deputet.
Pëllumbi u shfaq si avokat i Mërtirit dhe jo si një ligjvënës, i cili më shumë se të merakoset për një personazh të shpallur në kërkim, apo të ketë frikë nga dëshmia e një gazetari, duhet të shqetësohet për ato miliona euro që janë rrëmbyer nga buxheti i shtetit, nga taksat e shqiptarëve, dhe kanë përfunduar në duart e 3, 4, 5 apo më shumë personazheve, me apo pa kostum politik. Ai u shfaq si një frikacak që i trembet fjalës së lirë, por nuk ka frikë kur nga xhepat e shqiptarëve, me një të rënë të lapsit nxirren miliona euro që groposen ashtu si edhe plehrat.
Në fakt Pëllumbi dhe kolegët e tij të Rilindjes, të kthyer si një mburojë për aferën 430 milionë euro të inceneratorëve, sot humbën një shans për të treguar se të paktën janë njerëz dhe jo robotë që komandohen përmes mesazheve, pavarësisht se kush ua dërgoi.
Dhe për hir të transparencës, Pëllumbi i pari dhe pas tij çdo deputet i PS, minimalisht duhet të tregojnë se kush ua nisi mesazhin, pasi në të kundërt, çdokujt mund t´I lindë dyshimi se ajo sms mund të jetë dërguar ose nga treshja e personave të shpallur në kërkim, Mërtiri-Zoto-Gugallja, ose nga persona të tjerë që nesër mund të jenë subjekt i SPAK, pikërisht për këtë aferë korruptive.
Për sa kohë këta deputetë nuk do të tregojnë burimin e mesazhit, ata më shumë ngjajnë si të “punësuar” te inceneratorët, se sa me deputetët që minimalisht duhet të shqetësohen për milionat e groposura në aferën e plehrave.
