Kryeministri Edi Rama e ka quajtur përgjegjësi individuale aferën e inceneratorëve dhe tha se nuk është i shqetësuar që po shkojnë në burg ministra apo ish-ministra.
“Unë nuk jam i shqetësuar nëse apo dalin ministra apo ish-ministra sepse për këtë e kemi bërë reformën në drejtësi dhe unë e kam thënë që reforma në drejtësi bëhet për një drejtësi të drejtë dhe as të majtë apo të djathtë.
E kam besuar atëherë e besoj dhe sot, nëse ka njerëz që e kanë ngjyer gishtin apo dorën në një proces që është bërë për tu shërbyer komuniteteve dhe vendit dhe sigurisht që ata do të marrin ndëshkimin e merituar sepse e kanë bërë pas shpinës së një force qeverisëse që këtu është për tu shërbyer qytetarëve” – tha Rama.
Pyetjes se si ndodhi që në qeveri u miratuan gjithë ato procedura dhe askush nuk e vuri re se diçka nuk shkonte me çështjen e inceneratorëve, Rama u justifikua se hetimet e SPAK do të zbardhin të vërtetën.
“Unë nuk hyj tek ata që mendojnë këtë. Nuk kam si të përgjigjem për këtë. Ka veprime të dyshuara të individëve të caktuar që mbeten në nivelin e përgjegjësisë individuale. Prokuroria speciale po heton dhe ajo duhet të gjejë faktet dhe jo bazuar në llafe dhe spekulime.
Derisa kjo po hetohet e vërteta do të dalë deri në fund. Unë i mbetem nga dita e parë deri në fund se ato janë vepra të rëndësishme për komunitetet. Shkelet do t’i verifikojë prokuroria” – tha në një intervistë në VOA.
