Presidenti Ilir Meta ka thirrur sot mbledhjen e Këshillit të Sigurisë Kombëtare. Mbledhja e thirrur nga presidenti pritet të mbahet në orën 16:00. Takimi mbahet në një kohë kur ka një rritje të tensioneve mes Rusisë dhe Ukrainës, ndërsa mediat ndërkombëtare, referuar shërbimeve sekrete amerikane, kanë paralajmëruar nisjen e sulmit rus mbi Ukrainë të mërkurën.
Në këtë mbledhje nuk mund të jenë prezent kryeministri Edi Rama dhe ministrja për Europën dhe Punët e Jashtme Olta Xhaçka të cilët ndodhen për një vizitë 4-ditore në Shtetet e Bashkuara të Amerikës.
Ministria e Jashtme e Shqipërisë i ka kërkuar Rusisë që të ulë tensionet në kufirin me Ukrainën duke theksuar se i qendron pranë këtij shteti.
Përmes një njoftimi për shtyp, Ministria e Jashtme kërkon nga Putini që të zgjidhë krizën përmes rrugëve diplomatike dhe të respektojë sovranitetin territorial të Ukrainës.
