Përgjimi i një efektivi të policisë nga SHÇBA ka zbuluar banesën ku kultivohej kanabis në zonën e Ndroqit në periferi të Tiranës. Punonjësi i rendit që dyshohej për aktivitet kriminal rezulton se ka shkëmbyer mesazhe e biseda me gruan e shpallur në kërkim Rudina Xhambazi, e cila kishte marrë me qira banesën ku u gjetën rreth 250 bimë kanabisi. Gjykata liroi dy elektriçistët e arrestuar për këtë çështje dhe la në qeli punëtorin.
Hetimi i SHÇBA për një efektiv policie ka dërguar blutë e kryeqytetit në zbulimin e shtëpisë së barit në fshatin Pinet në Ndroq të Tiranës.
Mësohet se efektivi kishte komunikim me Rudina Xhambazin, vajzën që ka marrë me qira banesën ku kultivohej lënda narkotike në Ndroq dhe përgjimi i bisedave mes tyre ka zbuluar edhe laboratorin.
Por si efektivi ashtu edhe Xhambazi kanë mundur ti shpëtojnë prangosjes, ndërsa për ngjarjen janë arrestuar punëtori që kujdesej për bimët narkotike Erban Daja si dhe dy punonjësit e OSHEE-së, elektricisti Qemal Hasa dhe faturisi Erjon Mema.
Për tre te arrestuarit prokuroria ka kërkuar masën “arrest me burg” për akuzën e kultivimit të lëndëve narkotike dhe vjedhje te energjisë.
Ndërkohë gjykata la në burg vetëm punëtorin e laboratorit ku kultivohej kanabis në zonën e Ndroqit megjithëse nga avokati i tij u afrua 3 mijë euro garanci pasurore, dhe liroi në “arrest shtëpie” dy punonjësit e OSHE-së për shkak të lidhjes së paligjshme të energjisë në objektin ku përpunohej lënda narkotike.
Pronari i banesës, i cili është emigrant jashtë vendit, ka deklaruar se nuk kishte dijeni për kanabisin ndërkohë që në kërkim është shpallur shtetasja Rudina Xhambazi, e cila rezulton qiramarrëse dhe ishte ajo që kishte punësuar prej nje muaji e gjysëm 27-vjeçarin Erban Daja, i cili deklaroi në gjykate se deri tani nuk kishte marrë asnjë pagesë.
Sipas prokurorisë, brenda banesës në katin përdhe janë gjetur 247 bimë narkotike kanabis sativa me gjatësi nga 80 deri në 140 centimetër, të cilat ishin kultivuar në vazo plastike.
Në cilësinë e provave janë sekuestruar edhe 45 ushqyes elektrikë, 46 llampa dhe 11 freskuese që shërbenin për rritjen e bimëve narkotike.
/Ora News/
